ಇನ್‌ಸ್ಟಾಗ್ರಾಂ ಗೆಳತಿ ಜತೆಗಿನ ಚಾಟ್‌ ಸಹಪಾಠಿಗಳಿಂದ ಬಯಲು : ಮನನೊಂದು ಬೆಂಗಳೂರು ಯುವಕ ಆತ್ಮಹತ್ಯೆ

ಇನ್‌ಸ್ಟಾಗ್ರಾಂ ಸ್ನೇಹಿತೆಯ ಜತೆಗೆ ನಡೆಸಿದ್ದ ಚಾಟ್‌ ಸಹಪಾಠಿಗಳಿಂದ ಬಯಲಾದ ವಿಚಾರಕ್ಕೆ ಮನನೊಂದು ಮನೆ ತೊರೆದಿದ್ದ ಪಿಯುಸಿ ವಿದ್ಯಾರ್ಥಿ ಎಂಸ್ಯಾಂಡ್‌ ಲಾರಿಯಲ್ಲಿ ಶವವಾಗಿ ಪತ್ತೆಯಾಗಿರುವ ಪ್ರಕರಣ ಮಾರತ್‌ಹಳ್ಳಿ ಪೊಲೀಸ್‌ ಠಾಣಾವ್ಯಾಪ್ತಿಯಲ್ಲಿ ನಡೆದಿದೆ.

ಬೆಂಗಳೂರು : ಇನ್‌ಸ್ಟಾಗ್ರಾಂ ಸ್ನೇಹಿತೆಯ ಜತೆಗೆ ನಡೆಸಿದ್ದ ಚಾಟ್‌ ಸಹಪಾಠಿಗಳಿಂದ ಬಯಲಾದ ವಿಚಾರಕ್ಕೆ ಮನನೊಂದು ಮನೆ ತೊರೆದಿದ್ದ ಪಿಯುಸಿ ವಿದ್ಯಾರ್ಥಿ ಎಂಸ್ಯಾಂಡ್‌ ಲಾರಿಯಲ್ಲಿ ಶವವಾಗಿ ಪತ್ತೆಯಾಗಿರುವ ಪ್ರಕರಣ ಮಾರತ್‌ಹಳ್ಳಿ ಪೊಲೀಸ್‌ ಠಾಣಾವ್ಯಾಪ್ತಿಯಲ್ಲಿ ನಡೆದಿದೆ. ಸೋಮನಾಥ (18) ಮೃತ ವಿದ್ಯಾರ್ಥಿ.

ಮೇ 7ರಂದು ಮಾರತ್‌ಹಳ್ಳಿಯ ನಿರ್ಮಾಣ ಹಂತದ ಕಟ್ಟಡದ ಬಳಿ ಟಿಪ್ಪರ್‌ ಲಾರಿ ಎಂಸ್ಯಾಂಡ್‌ ಅನ್‌ಲೋಡ್‌ ಮಾಡಿದಾಗ ಸೋಮನಾಥ ಮೃತದೇಹ ಕಂಡು ಬಂದಿತ್ತು. ಈ ವಿಷಯ ತಿಳಿದ ಕೂಡಲೇ ಪೊಲೀಸರು ಸ್ಥಳಕ್ಕೆ ತೆರಳಿ ಪರಿಶೀಲಿಸಿದಾಗ ಗುರುತು ಪತ್ತೆಯಾಗಿಲ್ಲ. ಬಳಿಕ ಮೃತದೇಹದ ಜತೆಗಿದ್ದ ಮಾಸ್ಕ್‌ ಜಾಡು ಹಿಡಿದು ಹೊರಟ ಪೊಲೀಸರಿಗೆ ಅದು ಹೊಸಕೋಟೆಯ ಪಿಯುಸಿ ವಿದ್ಯಾರ್ಥಿ ಸೋಮನಾಥನದ್ದು ಎಂದು ಖಚಿತಪಟ್ಟಿತ್ತು ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು.

ಹೊಸಕೋಟೆ ಮೂಲದ ಸೋಮನಾಥ ಅಲ್ಲಿನ ಖಾಸಗಿ ಕಾಲೇಜಿನಲ್ಲಿ ಪಿಯುಸಿ ವ್ಯಾಸಂಗ ಮಾಡುತ್ತಿದ್ದು,ಮೇ 4ರಂದು ಮನೆಯಲ್ಲಿಯೇ ‘ನಾನು ಸಾಯಲು ಹೋಗುತ್ತಿದ್ದೇನೆ, ನನ್ನನ್ನು ಹುಡುಕಾಡಬೇಡಿ. ಪೊಲೀಸರಿಗೂ ದೂರು ಕೊಡಬೇಡಿ’ ಎಂದು ಡೆತ್‌ನೋಟ್‌ ಬರೆದಿಟ್ಟು ಬಂದಿದ್ದ. ಇದರಿಂದ ಆತಂಕಗೊಂಡ ಪೋಷಕರು ಹೊಸಕೋಟೆ ಠಾಣೆಯಲ್ಲಿ ದೂರು ನೀಡಿದ್ದು, ಆತನ ಪತ್ತೆಗೆ ಪೊಲೀಸರು ಕಾರ್ಯಾಚರಣೆ ನಡೆಸುತ್ತಿದ್ದಾಗಲೇ ಮೇ 7ರಂದು ಎಂಸ್ಯಾಂಡ್‌ ಲಾರಿಯಲ್ಲಿ ಮೃತದೇಹ ಪತ್ತೆಯಾಗಿದೆ.

ಸೋಮನಾಥ ಇನ್‌ಸ್ಟಾಗ್ರಾಂನಲ್ಲಿ ಸ್ನೇಹಿತೆಯೊಬ್ಬರ ಜತೆ ಚಾಟ್‌ ಮಾಡುತ್ತಿದ್ದು, ಆತನ ಸ್ನೇಹಿತರು ಅದರ ಸ್ಕ್ರೀನ್‌ಶಾಟ್‌ ತೆಗೆದಿಟ್ಟುಕೊಂಡು ಅವರದೇ ವಾಟ್ಸ್ಯಾಪ್‌ ಗ್ರೂಪ್‌ನಲ್ಲಿ ಹಾಕಿದ್ದರು. ಕಾಲೇಜಿನಲ್ಲಿ ತನ್ನ ಮಾರ್ಯದೆ ಹೋಗಿದೆ ಎಂದು ಸೋಮನಾಥ ನೊಂದಿದ್ದು, ಇದೇ ಕಾರಣಕ್ಕೆ ಮನೆಬಿಟ್ಟು ಬಂದಿರುವ ಸಾಧ್ಯತೆಯಿದೆ ಎಂದು ಅಧಿಕಾರಿ ಹೇಳಿದರು.

ಎಂಸ್ಯಾಂಡ್‌ ಲಾರಿ ಹತ್ತಿದ್ದೇಗೆ..?

ಸದ್ಯ, ಸೋಮನಾಥ ಸಾವಿನ ಸಂಬಂಧ ಅಸಹಜ ಸಾವು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಲಾಗುತ್ತಿದೆ. ಆದರೆ, ಸೋಮನಾಥ ಎಂಸ್ಯಾಂಡ್‌ ಲಾರಿಗೆ ಎಲ್ಲಿ ಹತ್ತಿದ್ದ ಎಂಬುದರ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ. ಅಲ್ಲದೆ, ಆತನ ಸಾವು ಹೇಗೆ ಸಂಭವಿಸಿತು ಎಂಬುದರ ಖಚಿತತೆಗೆ ಮರಣೋತ್ತರ ಪರೀಕ್ಷೆ ವರದಿ ಬರಬೇಕಿದೆ ಎಂದು ಅಧಿಕಾರಿ ಹೇಳಿದರು.

Share & Spread
error: Content is protected !!